San Martin eskola hezkidetza proiektu batean murgilduta dago, eta, horren baitan, sexu eta genero aniztasunari buruzko bi formazio egitea erabaki zuen, Udalarekin eta Gorbeialdeko Kuadrillarekin elkarlanean.
Lehenik eta behin, eskolako irakasleak izan dira formakuntza jaso dutenak. Izan ere, Udaleko Berdintasun Zerbitzuak kudeatuta, sexu eta genero aniztasunari buruzko formakuntza eskaini die Berdinduk, Eusko Jaurlaritzako sexu eta generoaniztasunari buruz informazioa eta arreta emateko zerbitzuak.
Saioan, oinarrizko kontzeptuak eta esku-hartzea landu dituzte, homosexualitatearen, transexualitatearen, bisexualitatearen eta intersexualitatearen gainean. Gorbeialdeko Kuadrillako Berdintasun teknikari Araitz Palaciosek azaldu duenez, "oso ondo" joan zen saio hura. Hala ere, pauso bat gehiago eman beharraz ohartu ziren, ikastetxetik herrira zabaldu beharraz. "Ez genuen nahi formakuntza ikastetxean bakarrik geratzerik. Umeen eta gazteen sozializazioan ikastetxeak badauka erantzukizuna, baina baita herriak berak eta familiek ere. Beraz, lanketa osoa egin ahal izateko, beste formakuntza saio bat egingo dugu", adierazi du Palaciosek.
Herritar guztientzako saioa
Bigarren saio hori urtarrilaren 29an, martitzena, egingo dute, kultura etxean. 18:00etan hasiko da, eta ordu eta erdi inguru iraungo du.
Bi zati izango ditu, teorikoa eta praktikoa. "Oinarrizko kontzeptuak landuko ditugu dinamika ezberdinen bitartez eta bideo batzuk ikusiz. Bestalde, parte-hartzea ere landuko da, herritarrek dituzten kezka eta zalantza guztiak argitu ahal izateko eta egoera ezberdinei erantzuna emateko", azpimarratu du Berdintasun teknikariak.
Umeen eta gazteen sexu eta genero aniztasuna da formakuntza saioaren oinarria. Hori dela eta, herritar guztiei zuzenduta dagoela jakinarazi du Palaciosek. "Nagusiki, familiei zuzenduta dago, umeak edota gazteak dituzten gurasoei, baina edonor etor daiteke. Ateak zabalik izango dira herritar guztientzat".
Informazio gehiagorako
Edozein zalantza edo kezka edukiz gero, harremanetan jartzeko dei egin dute. Batetik, Berdindu zerbitzuari dagokionez, 945 25 70 77 telefonora deitu edo berdindu. araba@aldarte.org helbidera idatzi. Gorbeialdeko Kuadrillako kontaktuak hauek dira: berdintasuna@gorbeialdea.eus helbidea edo 945 43 01 67 telefonoa.