Atzo, eguena, egin zuten 2019ko sagardo denboraldiaren irekiera ekitaldia, Askartzan, eta Iñaki Garaialde Baskoniako jokalari ohia eta kirol esataria izan zen kupelak zabaldu zituena.
Juanjo Peciña Iturrieta sagardotegiko arduradunak azaldu duenez, iaz baino "dezente" sagar gutxiago batu dute aurten. Bi arrazoi aipatu ditu: "Batetik, loraldian, martxo-apiril inguru horretan, euri asko egin zuen, eta, horren ondorioz, lorea erori egin zen, galdu egin zen, eta horrek eragina izan du sagar kantitatean. Bestetik, iaz, sekulako uzta jaso genuen, inoizko handiena, eta, horrelako uzta baten ostean, zuhaitzak ahulagoak izaten dira hurrengo urtean. Horren aurrean ezin dugu ezer egin, naturak agintzen du".
Hori dela eta, Gipuzkoatik ekarri behar izan dituzte sagarrak. "Iaz, soberan gelditu ziren tona batzuk, alferrik galdu ziren sagar asko, eta aurten, berriz, eskatu egin behar izan ditugu. Gehienbat, Gipuzkoatik ekarri ditugu, Urretxutik, Debatik, eta abar. Gure kasuan, sagar ekologikoak erabiltzen ditugunez, ez daude edonon, eta leku konkretu batzuetan eskatu behar ditugu", adierazi du Peciñak.
Nafarroatik ere ekarri dituzte sagarrak. "Mahai sagarrak Erriberatik ekarri ditugu, hauek ere ekologikoak. Baina hauek sagar zukurako erabiliko ditugu".
Kalitate "oso onekoa"
Sagar gutxi, bai, baina kalitate "oso onekoa" da aurtengoa. "Oso sagar osasuntsua sartu da dolarean, inolako gaixotasunik eta kalterik jasan gabekoa. Horrek asko laguntzen du sagardoa egiteko orduan. Horrez gain, gradu eta azukre aldetik, mota ezberdinak saltzen ditugunez, eta Euskal Herriko sagarrak direnez, sagardoa betiko moduan egin dugu", dio.
Zaporeari dagokionez, "gozo puntuarekin" dago oraindik sagardoa, baina "denborarekin joango da bere onera". "Aurten, garratz puntu bat ere badu. Baina azpimarratu behar dut oso sagardo ona eta osasuntsua atera dela". Koloreari erreparatuta, berriz, Peciñari ez zaio orokortzea gustatzen. "Kupel bakoitzetik kolore ezberdineko sagardoa ateratzen da; beraz, orokortzea akats bat da, nire ustez".
Aurreikuspen onak
Gaur, egubakoitza, irekiko dute Iturrieta, eta, denboraldiari begira, aurreikuspen onak dituzte. "Ohiturak aldatu egin dira eta jende gehiena eguerdietan etortzen da. Baina gauetan ere animatuko dira; giro onean egingo dugu denboraldia, beti bezala".