Eguenean izan zen Santa Zezilia, eta data seinalatua dela-eta emanaldia egingo du Bizente Goikoetxea abesbatzak domekan; San Martin elizan izango da, 12:30ean.
Aurretik, gaur bertan –barikua–, Bertxoko sariketako hirugarren kanporaketa jokatuko da Zabolako elkartean. Aramaioar bat ere ariko da, gainera, kantuan: Martin Abarrategi. Harekin batera, finalerako txartel bila abestuko dutenak dira Mikel Martin, Xabi Antia eta Beñat Garaio. 19:30ean hasiko da saioa.
Aitor Ugarte, sailkatuta
Azaroaren 29ko Gasteizko Hala Bedi tabernako finalerako txartela dagoeneko baduena Aitor Ugarte da. Sariketako bigarren kanporaketan abestu zuen, aurreko barikuan, eta aramaioarra eta Unai Anda izan ziren entzuleen bertsolari gustukoenak. Arabako Bertsozale Elkarteak eta Hala Bedi Irratiak antolatzen duten sariketaren finalean sei bertsolari ariko dira.