Lelo eta irudi berria hainbat komunikazio, kartel eta euskarritan erabiliko du Udalak. Honela, "kalera begirako irudia eguneratu eta modernizatu" nahi dute, "modu berean gertutasuna ere eskaintzeko".
Irudiak aplikazio berezia izango du, arloaren arabera; esate baterako, ingurumena, berdintasuna, kultura-kirola eta euskara: "Irudi honen helburua da aterki bat jartzea arlo bakoitzean sortzen diren ekintza, ekimen edota mezuei, komunikazioa hobetuz eta denok jakiteko zertan edo zein arlotan lanean dabilen Udala", azaldu dute.
Euskalkian jarri dute herriaren izena, "gertukoago" egiteko helburuarekin, eta bizi hitza gehitu diote, "bere zentzu zabalean", Aramaio "herri bizi bat" nahi dutelako, aramaioarrek bizi dutena eta bizi mantentzen dutena zentzu denetan, "bizi kalitatez, ingurumenarekin, elkarbizitza ahalik eta on eta lagunkoienean...".