goiena.eus

AHTaren lanek Aramaion eragindako kalte eta arazo "larriak" salatu ditu EH Bilduk

  Politika  Aramaio

Abiadura Handiko Trena eraikitzeko lanen "utzikeriak" Aramaion sortutako arazoak gaitzetsi ditu koalizio abertzaleak. Hori dela eta, Lierni Altuna Aramaioko alkatearen eta ADIFeko arduradunen agerraldiak eskatu ditu EH Bilduk Arabako Batzar Nagusietan. Altuna bihar –egubakoitza– 09:00etan da joatekoa Bide Azpiegitura eta Mugikortasunaren batzordera. ADIFek, berriz, ez du erantzunik eman.

AHTaren lanek Aramaion eragindako kalte eta arazo "larriak" salatu ditu EH Bilduk
AHTaren lanek "kalte eta arazo larriak" eragin dituzte Aramaion, koalizio abertzalearen arabera. Argazkia: EH Bildu. | Ikusi handiago | Argazki originala

EH Bilduk AHTaren lanek Aramaion eragindako kalteak eta arazo "larriak" salatu ditu. "Zerrenda luzea da; izan ere, 2008a ezkero lur-jausiak gertatu dira, irteera gabe utzi dituzte hainbat lursail, desjabetzeak eguneratu gabe daude eta bertako herritarrek gehiago ordaindu behar dute zergetan eta hainbat bide eta errepide guztiz suntsituta daude. 2010ean lur-jausi oso larri baten ostean, errepide nagusia itxita egon zen 18 hilabetez eta bigarren mailako beste errepide eta landa bideak erabili ziren Arrasaterako bidean. Bide hauek guztiak erabat suntsituta daude gaur egun, eta, konpontzeko konpromisoa hartu zuten arren, ez da ezer egin azken urteotan", adierazi du koalizio abertzaleak prentsa-ohar batean.

Alkatea, Gasteizera

EH Bilduk eskatuta, Lierni Altuna alkateak Arabako Batzar Nagusietako Bide Azpiegitura eta Mugikortasunaren batzordean agerraldia egingo du bihar, egubakoitza, 09:00etan. "Bizi izan dugunaren eta egungo egoeraren berri ematera noa", azaldu du. ADIFeko arduradunei ere egin die eskaera EH Bilduk, baina hauek ez dute erantzunik eman.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa