21:00ak eta Kultura etxeko eserlekuetan jendea urduritzen hasia da, horien artean urdurien dagoena Pantxika Lamur. Badirudi hitzartua zegoen artistak kale egin duela, eta Pantxikak barruan duen artista hori aske utzi nahi du. Aramaioarrak bizkor konturatu dira, publikoaren artean eserita zegoen emakumea, beste ikusle bat baino, Nik egin beharko & ko ikuskizunaren protagonista dela.
Ainhoa Juaniz aktoreak arriskatzea gogoko du, eta argi dago Nik egin beharko & ko ez dela antzezlan arrunt bat. Juaniz, Pantxika Lamur pailazoaren azalean sartzen denean, zer gertatuko den jakitea ia ezinezkoa da.
Clowna, umorea, antzerkia, zirkua... Pantxika Lamurrek bizkor lortu du aramaioarren arreta bereganatzea eta bere burua neskazaharren erreginatzat duen pailazoarekin une ederrak pasa dituzte. Ikusle batzuk gainera oholtzara igo zituen Lamurrek, jendearen barre algarak areagotuz.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.