Pasa den asteburuan jokatu ziren 2017ko Arabako Bertsolari Txapelketarako sailkatzeko lehen bi kanporaketak. Andere Arriolabengoa eta Paula Amilburu Lantziegon egindako kanporaketan aritu ziren, eta lan benetan txukuna egin zuten biek ala biek. Arriolabengoa izan zen saioko irabazlea 176,5 punturekin eta Amilburuk bigarren postua eskuratu zuen 163,5ekin. Beraz, Aramaioko hiru bertsolarik bermatuta dute 2017ko edizioko parte hartzea; Manex Agirrek eta Xabi Igoak aurreko edizioko finalera heltzeagatik, eta Arriolabengoak kanporaketako irabazle izateagatik.
Asteburu honetan Iker Agirreren eta Peru Abarrategiren txanda izango da. Agirreren saioa Izarran izango da egubakoitzean eta arerio izango ditu Ander Solozabal, Xabier Antia, Unai Gomez, Alberto Martinez "Beito", eta Irati Ruiz de Pinedo. Peru Abarrategiren kanporaketa zapatuan jokatuko da Araian. Jon Sanchez , Oier Arbina, Rikardo Gonzalez De Durana, Izar Mendiguren, eta Jagoba Apaolaza izango ditu aurkari bertsolari gazteak.