Txistulariek erretiroa hartu zuten iaz
Jai batzordearen asmoa da bai txistulariei eta baita dantzariei ere omenaldi xumea egitea. Izan ere, beti herriko jaiak alaitzen eta girotzen ibili diren txistulari eta danboril-joleek iaz erretiroa hartu zuten. Hala, Joakin, Patxi eta Juan Jose Aiastui eta Bizente Mondragon izango dira pregoilariak. Modu horretan, urteetan egindako lana eskertu gura diete.
Dantza taldearen 60. urteurrena
Txistulari eta danbolin-joleekin batera Lagun Artean dantza taldekoak ere izango dira balkoian. Aurten 60. urteurrena ospatzen dabiltza dantza taldean; urteetan dantzaren bitartez eskainitako une hunkigarriak eskertu gura diete modu horretan. Dantza taldearen asmoa da elkartearen sorreran egon zirenen ordezkaritza eta gaur egun daudenen ordezkaritza bat igotzea balkoira: Morras, Gemma Arriolabengoa, Lurdes Uribarren, Xabi Igoa, Goiuri Larrañaga eta Ibon Kortabarria izango dira.
Jaiak eztanda egin ostean, trikiti eskolako Trikikalejira taldearekin kalejira egingo dute herriko kaleetan.
