Gureia auzoan hobekuntza lanak egiteko ia milioi erdi euroko laguntza onartu du Aldundiak

Arantzazu Ezkibel Galdos 2016ko ots. 22a, 11:48

Arabako Aldundiak Gureia auzoan obrak egiteko 435.171,67 euroko laguntza onartu du. Aramaioko Udalak iaz eskatu zuen plan foraleko bi obretatik bat da Aldundiak onartu berri duena. Udalak aho batez eskatu zuen Gureia auzoko obrak egiteko laguntza. Laguntza horrekin Gureia auzoko kaleen zoladura, argiteria, argi-indarraren eta telefonoaren lurperatzea, eta euri uren saneamendua hobetuko dute. 

Lierni Altuna alkatea, Udal gobernuaren izenean, pozik dago lanok egiteko laguntza onartu duelako Aldundiak: “Proiektua eta obra zuzendaritza esleitu behar ditugu orain. Bi fasetan egingo dira obrak. 2016an 224.331 euro emango digute eta 2017an 210.840,67 euro”.

Oposizioa ere gustura 

Aramaioko EAJk "atsegin handiz" hartu du proiektuaren onarpena: “EAJk Aramaion duen udal taldeak atsegin handiz ikusi du azken hauteskundeetan herritarrei egin zien hauteskunde-programa gauzatzen ari dela”. 

Plan foralean bi obra handi egiteko laguntzak eskatu zituen Udalak iaz; bada, Matxin kaleko konponketak egiteko proiektua ez dute onartu. "Matxin kalerako beste konponbide batzuk aurkitzen hasi beharko gara", dio Altuna alkateak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak