Aratusteak 2016

Mozorro lehiaketa egingo dute Aramaion, Aratuste-zapatuan

Mozorroak gertatzeko azkeneko eguna izango dute gaur aramaioarrek. Izan ere, bihar, Aratuste-zapatua ospatuko dute. 17:00etan elkartuko dira frontoian eta kalejira egingo dute plazaraino; ondoren mozorro lehiaketa izango dute. Eskolan martitzenean ospatuko dituzte Aratusteak.

Mozorro lehiaketa 18:00etan izango da. Sariak bi mailatan banatuko dituzte: haurren maila eta 14 urtetik gorakoena. Bietan sariak berdinak izango dira: lehenengoari 90 euro emango diote; eta bigarrenari 36 euro. Originaltasuna ere sarituko dute. Bi sari emango dituzte: 48 euroko lehenengoa eta 30 eurokoa bigarrena.

Ondoren txokolate beroa eta Txiki jaia izango dute. Musika jartzen Nemux Sonido taldea ibiliko da.

Martitzenean, eskolan 

Aratuste-martitzenean eskolakoek egingo dute ospakizuna. 14:00etan eskolatik irten eta desfilean joango dira herriko plazaraino. Musika estiloak izango da aurten aukeratu duten gaia. HHkoak mexikarrez mozorrotuko dira; LH 1-ekoak batukada; LH 2-koak tuna; LH 3-koak txaranga; eta, LH 4 eta 5-ekoak heavy.

Sastiña aurrealdean, gela bakoitzak bere aurkezpena egingo du. Ondoren eskolara itzuliko dira desfilean,  eta txokolatea hartuko dute eskolako aterpean. Eguraldi txarrarekin, frontoian egingo dituzte ekitaldiak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.