Mota guztietako eztiak dastatu dituzte Sastiñan

Aramailur kontsumo elkarteak antolatuta, ezti dastaketa egin zuten atzo arratsaldean, Juan Mari Arriolabengoa ezti ekoizlearen gidaritzapean. Arriolabengoak lehenik aurkezpen bat egin zuen, eta bertan eztiaren propietateak eta onurak azaldu zituen, baita ezti barietate bakoitzaren ezaugarriak eta bakoitza non ekoizten den ere. Horren ostean, herritarrak ezti desberdinak probatzeko aukera izan zuten, eta bakoitza zein motatakoa zen asmatzen ahalegindu ziren.

Euskal herri osoan zehar ekoiztutako hamar ezti-pote ekarri zituen atzo Sastiñara Juan Mari Arriolabengoak. Horretaz gain, erdiko mahaian Aramaioko bertako ekoizleek eginikoa ere jarri zuen, herritarrek dastatzeko aukera izan zezaten. Milalore barietatea da Aramaion ekoizten dena. Horrek esan nahi du, ezti hori egiten duen erleak lore desberdin askotako nektarra hartu dutela.

Arriolabengoak adierazi zuenez, "eztia naturak ematen digun produkturik onena da". Nabarmendu zuenez, elikagai oso konpletua da, eta osasunarentzat ere hainbat onura dakartza.

Aurkezpena amaitutakoan, Sastiñan bildutako herritarren txanda iritsi zen. Ezti-mota bakoitzetik pixka bat probatu eta taula batean idatzi zuten ea haien ustez zein motatakoa zen. Batzuk fin ibili ziren, beste batzuk ez horrenbeste.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.