Arabako bertso eskola arteko txapelduna da Peru Abarrategi aramaioarra

Peru Abarrategi eta Peru Amorrortu.

Zapatuan Kanpezun bukatu zuten aurtengo Arabako bertso eskola artekoa, topaketa eta gazteen finalarekin. Bertsotan ibili ziren oholtza gainean goizean, eta plazan arratsaldean. Peru Abarrategi aramaioarrak irabazi zuen eskola arteko finala. Ekainaren 27an Orion jokatuko den Euskal Herriko eskola arteko finalerako txartela lortu du.

Kanpezuko kultura etxean ospatu zuten bertso festa. Kanpezuko bertso-eskolako txikiak izan ziren lehenak oholtzara igotzen, eta ederki piztu zuten giroa. Horien ondotik Aramaioko bertso-eskolakoek parodia ederra prestatu zuten.

Irribarrea ahoan oholtza igo ziren Markel Yoller, Irati Ruiz de Pinedo, Peru Abarrategi, Unai Etxenausia, Peru Amorrortu eta Unai Argote bertsolariak. Irribarrez eta bertsotan euren onena emateko prest. Zortziko nagusian zein txikian saio arinak eta umore ukitu ederrekin eskaini zituzten. 60 entzuleren aurrean, saio orekatua eta bizia osatu zuten ofizioka. Ondoren, bakarkakoen txanda iritsi zen, puntuari erantzun eta hitzari bertso bat bota beharra.

Epaimahaiak hala erabakita Peru Abarrategik irabazi zuen finala. Hemendik aurrera, edizio batetik bestera, eskuz esku pasatuko den saria jaso zuen. Gasteizko Peru Amorrortuk bigarren postua lortu zuen. Biak izango dira Orion, ekainaren 27an, izango den Euskal Herriko eskola arteko txapelketako finaleko Arabako ordezkariak, herrialdeko bertso-eskolako gazte eta haur guztiek egindako ahaleginaren erakusgarri bikainak.


ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.