"Oso pozik" dago Larraitz Arriolabengoa Musika Asteak izan duen jarraipenarekin. Eguaztenean, esaterako, Iban Nikolaik jende asko batu zuen Sastiñan. "Umeek galdera pila bat egin zizkioten Ibani, eta amaieran, bai umeak eta baita helduak ere animatu ziren didgeridoo instrumentua probatzera". Gaur, egubakoitza, Txorbela otxoteak girotuko du poteoa; eta, ondoren flamenko ikuskizuna eskainiko du Aitor Escobarrek.
Flamenkoaren doinuak
Gaur, egubakoitza, Txorbela otxoteak poteoa girotuko du. 18:30ean hasita, herriko lau tabernatan ibiliko dira. Ondoren, Aitor Escobar arrasatearrak Origen flamenko ikuskizuna eskainiko du Sastiñan; 20:30ean izango da. Gitarra eta kaxa soinuak herritarrei eskaintzea da asmoa: "Gauza ezberdinak eskaini nahi izan ditugu; ohituta gauden soinu horietatik urrundu eta beste musika mota batzuk erakustea izan da asmoa", azaldu du Arriolabengoak. Iaz, esaterako, jazz doinuak eskaini zituzten.
Kantu afaria
Bihar, zapatua, kantu afaria izango dute. 50 lagun inguru elkartuko dira eskolako jangelan. Domekan, musika asteari agur esateko, Bixente Goikoetxea eta Elai abesbatzen emanaldia egongo da. Ondoren, luncha.