Martxan onean doa Lorabarri astea. Astean zehar hainbat ekitaldi egin dituzte, tartean, irudian ikus daitekeen sukaldaritza ikastaroa. Erretiratuen elkartean egin zuten, eta Ortutik ahora kolektiboko kideak eskaini zituzten azalpenak.
Gaur, azoka
Gaur, zapatua, ekitaldi nagusia egingo dute. Herriko plazan azoka jarriko dute: baratzeko produktuak, gazta, ogia, sagardoa... erosteko aukera egongo da. Gainera, Aramaioko txikua –moxala– dastatzeko aukera ere egongo da. Horrez gain, Soraluzeko Txirbila pastagileak eta marmeladak egiten dituzten Itxoste etxekoak egongo dira.
Bisitak bertoko ekoizleei
Bihar, domeka, 11:00etan Azkoagan, Euzki okindegira eta Itturalde ortura bisita egingo dute. Artisau eran eta modu ekologikoan nola lan egiten duten ikusteko aukera egongo da. 17:00etan, herriko plazatik abiatuta, eskolako umeekin Lamien bila karobira ibilaldia egingo dute.
'Bizi baratzea' liburua
Jakoba Errekondok Bizi baratzea, garaian garaikoa garaiz liburuaren aurkezpena egingo du astelehenean, 18:00etan, Oletan; eta, 19:00ean, Sastiñan.
