Udal eta Foru hauteskundeak 2015

Rafael Bengoa: "Gestioan esperientzia duen jendearekin osatu dugu EAJren zerrenda"

EAJren Aramaioko hautagaiak. Argazkia: Aramaioko EAJ

Rafael Bengoa izango da EAJren alkategaia Aramaion. Bengoak badu esperientzia Udal jardunean; izan ere, zinegotzi izan zen 1983tik 1987ra bitartean. EAJren proposamenari baiezkoa esatea kosta egin zaiola dio. Hala ere, jaso duen babesa ikusita konpromisoa hartu du aurrera egiteko. Udalaren gastuaren "murrizketa edo kontrola" izango dela jeltzaleen programaren oinarrietako bat azaldu du.

Nola hartu duzu erronka?
Alde batetik kosta egin zait baiezkoa ematea. Espero ez nuen gauza bat izan da; baina, lagunen eta batez ere familiaren bultzadarekin eta adostasunarekin konprometitu egin naiz.

Osatu dituzue EAJren zerrendak. Nolako profileko jendea dago?
Gestioan esperientzia duen jendea dagoela esango nuke. Adinari dagokionez, jende gazte-gaztea ez da baina 60 urtekoak ere gazteak izan daitezke.

EAJren programa zertan oinarrituko da?
Gastuen murrizketa edo kontrola behar dugu. Bestalde, euskara mailan gestio integral bat egin behar dugu. Kultura mailan, polo interesantea daukagu hemen goian: eskola, kiroldegia eta kultura etxea. Uste dut hemen kultura polo bat egin beharko litzatekeela. Bestalde, Udalaren eta Aldundiaren laguntzarekin, auzoak azpiegitura eta zerbitzuetan dotatu behar ditugu. Kaleko maila berean egon beharko lirateke; auzoei garrantzia eman nahi diegu. Uraren gestio integrala ere egin beharko litzateke. Ur garbien zerbitzua hobetu egin beharko litzateke eta, gainera, saneamenduko urei ere buelta bat eman beharko litzaieke. Azkenik, Aldundiarekin lan sakona eta serioa egin behar dugu Aramaion nagusien egoitzaren zerbitzu batzuk ezartzeko. Gaur egun ez dugu egoitzarik eta horrek asko mugatzen gaitu.

Udal jardunean zer hobetu daiteke?
Berebiziko garrantzia duten gauza batzuk daude: Mendiolako IBZ zentroa indartu egin behar da eta han egin den inbertsioa justifikatu. Urbanizazio plana ere martxan jarri beharko litzateke: hamar urteko atzerapena dauka-eta. Bestalde, hirigintza aldetik seriotasun bat behar da: hainbat gauza lizentzia barik eta baimen barik egiten dira Aramaion. Hori arautu egin behar da. Azpiegituren mantentze lan integrala ere egin beharko litzateke. Eta, Biomasaren proiektua ere birplanteatu egin beharko litzateke. 

 

EAJren zerrenda

1. Rafael Bengoa
2. Roman Berriozabal
3. Andoni Erkiaga
4. Mertxe Mondragon
5. Amaia Barredo
6. Iñaki Elejalde
7. Roberto Aginagalde
8. Ane Miren Atin
9. Luis Mª Bengoa
10. Juan Miguel Loiti
11. Rodrigo Gartzia

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.