Lokatzak "infernu" bilakatu du Aramaion jokatutako Euskadiko Openeko proba

Jokin Bereziartua Lizarazu 2015ko mar. 15a, 16:46

Aramaion hasi den mendi bizikletako Euskadiko Openean lokatza izan da protagonista nagusia; izugarri gogortu du proba eta horregatik federazioak erabaki du itzuli bat gutxiago egitea bost kilometro eta erdiko zirkuituari. Elite mailan Castro Urdialesetik etorrirako Jose Antonio Diez (01:37:36) izan da azkarrena. Hainbat eroriko eta susto izan dira, baina istripu larririk ez. 152 txirrindulari irten dira maila guztiak kontuan hartuta. 

Itzuli bat gutxiago egin izana horrela azaldu du urtero antolakuntzan aritzen den Martin Arriolabengoa aramaioarrak: "Lasterketan lehena zihoanak bost minutuko atzerapenarekin zihoan eta federazioak lehenari gehienez 100 minutuko marjena ematen dio, horrela dago kalkulatuta. Bost itzuli egingo balira langa hori gainditu egingo litzateke eta horregatik erabaki da itzuli bat gutxiago egitea".

"Infernu bat izan da"

Elite mailan irabazi duen Jose Antonio Diezek "infernu" moduan definitu du gaurko proba: "Infernu bat izan da. Atzo [zapatua] ez nintzen etorri ibilbidea probatzera eta esan zidaten lokatza handia zegoela, baina horrenbeste... Ia ezin dut hitz egin, azkenean ez nuen aldatu ere egiten... Hala ere, garaipena lokatzari zor diot, fisikoki ez nago-eta nire puntuan".

Urteroko zirkuitua azkenean

Era berean, lokatzak eragin du ibilbidean aurten aurreikusitako aldaketa txikia ere bertan behera uztea: "Proba ikusgarriagoa egiteko malda polit bat genuen, baina lokatzarekin oso arriskutsu zegoen eta segurtasunagatik erabaki dugu kentzea", argitu du Arriolabengoak.  

Erlazionatuak

Mendi bizikletako Euskadiko Opena Aramaion

Jokin Bereziartua Lizarazu 2015 mar 15 Aramaio

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak