Aramaioko Udala, Fagor Etxetresnetako kaltetuen eta Mondragonen artean bitartekari izateko gertu

Aramaioko Udaleko alderdi guztiek –Bildu, Aramaioko Alkartasuna eta EAJ– aho batez onartu zuten Fagor Etxetresnen itxiera dela-eta kaltetutako plataformako kideek eguaztenean aurkeztutako mozioa. Mozioaren helburu nagusia da Udalari eskatzea Mondragon Taldearekin bitartekaritza lanak egin ditzala: "Aramaioko Udalak hartu duen jarrera eredu moduan hartu beharko litzateke. Alderdi guztiek onartzeaz gain, alkateak gure azalpenen ostean egin dituen adierazpenak txalotu gura ditugu. Gutxi gorabehera esan du Fagor Etxetresnak erori ostean sortu diren arazoak kooperatiba guztien artean konpondu beharko liratekeela. Oso interesgarria izan da", adierazi zuen Ordaindu plataformako Mikel Olabek.