Erregulartasuna mantentzeko asmoz ekingo dio denboraldiari Aramaixok

Aramaixo taldeko jokalariak joan den egueneko entrenamendu saioa hasi aurretik.

Udako geldialdiaren ostean, aste bukaera honetan hasiko da Araban areto futboleko 2014-2015 denboraldia. Arabako talde onenen aurka lehiatuko dira aramaioarrak; lehen partiduan Bar Edu Team taldearen aurka jokatuko dute. 

Aramaixo taldeak irail hasieran ekin zion denboraldi-aurreari eta taldeko koordinatzaile Andoni Elejalde pozik dago orain artek lanarekin: "Jokalariak gogotsu daude, energiarekin. Jokalari aldaketak izan dira iazko denboralditik honakora, baina taldea orekatuta dagoela esango nuke".

Denboraldi berrirako helburua izango da, emaitza zehatzetatik harago, urte osoan erregulartasuna mantentzea: "Urte osoan erregulartasuna eta intentsitatea mantentzea izango da aurtengo erronka. Izan ere, hori lortzen badugu eta aste barruko entrenamenduetan lana ondo egiten badugu, emaitzak bakarrik etorriko dira". 

Arabako talde onenen aurka

Taldea oraindik ez dago erabat zehaztuta baina aurten kopuru "polita" lortu dutela uste du taldeko koordinatzaileak: "Azken orduko aldaketarik ez badago, 10 edo 12 jokalari ziur izango ditugu. Kopuru polita da". 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.