Beste batez, Sastiñako ermitatik Aramaioko Bizente Goikoetxea plaza gogotik alaitu zuen musikak; oraingoan saxo, tronboi, klarinete, banjo eta kontrabaxuaren oihartzunekin. Ohiturari eutsiz, hasieran hotz xamar hasi zen publikoa, baina errepertorioarekin aurrera jarraitu ahala eta musikariak berotzen hasi zirenean gozatu ederra hartu zuten bai lehenengoek baita bigarrenek ere.
Begoña Divar abeslari eta klarinete jotzaileak gidaturiko zazpikotea gogotsu aritu zen; esandako 20ko hamarkadako doinuak gurera ekartzen eta dotorezia eta estiloarekin jazz musikaren hastapeneko estandarrak propio egiten. Besteak beste, Joe Oliver, Spencer Williams edo Kid Ory maisuen ikasbideak jarraitzen dituzte gasteiztarrek eta egubakoitzean argi utzi zuten Gasteizeko Jazzaldian parte hartzearen arrazoia.