Zapaturako Aramaioko Gazte Asanbladak, Itur-Zuri emakume elkarteak, Alaiak erretiratuen elkarteak eta herriko trikitilariek egun osorako egitaraua antolatu dute, Udalarekin elkarlanean: poteoa Bizente Goikoetxea plazatik (12:00), herri bazkaria pilotalekuan –txartelak salgai daude herriko tabernetan, hamar eurotan– (14:30), kalejira (17:00), mozorro lehiaketa eta ondoren umeendako tailerrak.
San Martin eskolan beldurra izango da aurtengo gaia
Bestalde, San Martin eskolan martitzenean ospatuko dituzte Aratusteak. Aurtengo gaia beldurra izango da eta zikloka mozorrotuko dira. Eskolako arduradunek aurreratu dutenez, besteak beste banpiroek, sorginek, giza-otsoek eta eskeleto bizidunek hartuko dute eskola. 14:00etatik 16:00etara egingo dute ikuskizuna: euririk egiten ez badu Nardeaga kaletik kalejiran jaitsiko dira Bizente Goikoetxea plazara. Euria egin ezkero, berriz, kiroldegian elkartuko dira guraso eta irakasleen aurrean urteroko ikuskizuna eskaintzeko.
