Gaur aurkeztuko dute 'Bazan behin Aramaixon' liburuxka

Liburuxkako pasarteetako bat. Irudiaren egilea: Belen Moreno.
Gaur aurkeztuko dute, Aramaioko kultura etxean (17:30), 'Bazan behin Aramaixon' liburuxka. Herriko ondare diren ipuinak jasotzen ditu lanak, Arantza Ozaeta eta Dibina Arriolabengoak duela zenbait urte egindako bilketa lana aprobetxatuta. Aurkepenaren ostean salgai egongo da liburua, hamar eurotan.

Aspaldiko ekimen baten emaitza da proiektua, Udaleko Euskara batzordeak bultzatu duena. Euskararen transmisio lanerako lekukorik garrantzitsuenak eta egokienak bildu dira liburuxka batean: Aramaion bertan, ahoz aho, urtetan zehar gorde diren ipuin, kondaira eta kontu zaharrak. Bertako edadeko jendeari bildu, eta ume nahiz helduentzako bildumatxo bat prestatu dute, ikusgarria eta ondo zaindua. Dibina Arriolabengoa eta Arantza Ozaeta izan dira duela zenbait urte bilketa-lan mardul hori egin zutenak.
Ozaeta eta Arriolabengoaz gain, Belen Morenok –irudigilea–, Miel A. Elustondok, Jabier Kaltzakortak, Txipi Ormaetxeak –edizioa– eta Manex Agirrek –zuzentzailea– hartu dute parte proiektuan.

Herritarrak protagonista aurkezpenean

Ipuinak Aramaioko euskalkian daude idatzita eta ondoan itzulpena dago, euskara batuan. Proiektu berezi denez, modu berezi baten aurkeztu gura du Udalak. Zenbait herritar gonbidatu dituzte liburuan agertzen diren ipuin laburrak kontatzeko. Era berean, San Martin eskolako haurrek eta bertso eskolako kideek kantatzekoak diren ipuinak abestuko dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.