2014ko Udal aurrekontua onartzeko Aramaioko Udaleko ordezkariak herritarrekin elkartzen hasi dira. Atzo bertan Uribarri auzoko elkartean egin zuten bilera eta Ramon Ajuria alkatearen arabera, auzotarrek eskertu zuten azalpenak jasotzea.
Aurtengo aurrekontua koadratzeko burukomin handiak izan dituztela adierazi zuen alkateak azken osokoa amaitu ostean: "Oso zaila izan da aurrekontua koadratzea. Iaz bagenuen margen bat dirua bideratzeko baina aurten murrizketa handia jaso dugu, estu ibili gara".
Auzoz auzo bilerak egin ondoren otsailaren 22an herri batzarra egingo dute eta hilaren 26an Ogasun batzordetik pasako da. Azkenik, martxoaren 5ean egingo dute Udal aurrekontua onartzeko osoko bilkura.
Alkatearen aurkako argitalpena
Bestalde, azken osokoan bi mozio ere izan zituzten mahai gainean. Batetik, 2013ko abenduaren 13an Diario de Noticias de Alava egunkarian alkatearen gaineko albiste baten harira aurkeztu zuen mozioa Aramaioko Alkartasunak. Jose Ramon Uribe zinegotziak salatu zuen egunkari horretako albiste bat alderdikeriatik eta objektibotasun faltatik idatzita zegoela eta Ramon Ajuria alkatea aipatzen zuela aurreko legealdiarekin gertatutakoekin nahastu nahian. Albiste hark irregulartasunak aipatzen zituen Udalaren kudeaketan eta, Uriberen ustez, larria da hori egitea. Informazioa gezurretan oinarrituta zegoela eta bestelako interes batzuk bilatzen zirela uste du Uribek. Mozioak aurrera egin zuen, EAJren abstentzioarekin.
EAJk, Garoñako zentral nuklearra eraisteko mozioa
Bestalde, EAJk Garoñako zentral nuklearra behin betiko itxi eta eraisteko mozioa aurkeztu zuen. Iñaki Nafarratek azaldu zigun zein den euren eskaera nagusia: "Estatuko Gobernua nahasten ari da euren proposamena da Garoña berriro zabaltzea. Hori guk ez dugu nahi, inolaz ere. Guk nahi duguna da behin betiko ixtea eta hori azaldu dugu osokoan". Garoña ixteko mozioa ere onartu zen, EAJk Bilduk jarritako emendakina onartu ondoren.
