Irakurketa kluba osatu guran, haur eta gurasoek batera irakur dezaten

Bularretik Mintzora kanpainaren barruan irakurketa klubak osatu guran dabiltza Aramaion ere. Bularretik Mintzora kanpaina sistematizatu bat izateko bokazioz jaio zen 2007ko abenduan. Haurren guraso eta hezitzaileei zuzenduta dago eta helburu nagusia da 0-6 adin tarteko haurrengan irakurketa ohiturak sustatzea gurasoekin eta haien hezitzaileekin, euren ingurune naturalean. Hau da, antolatzaileen asmoa da haurrek eta gurasoek denbora tarte bat hartzea liburuekin gozatzeko.

Saio horietan gurasoek eta haurrek ekintza batzuk burutzen dituzte, hala nola, irakurketa ozenak, liburuen aurkezpenak, irakurritako liburuen gaineko gomendioak eta beste hainbat ekintza, liburuekin gozatzeko eta idatzizko literaturaren curriculum bat pixkanaka osatzen joateko.

Hainbat helburu zehatz dituzte: irakurketa sustatzea, kalitatezko euskal bibliografia ezagutzea, guraso eta haurraren arteko irakurketa giroa sortzea, gurasoak ozenki irakurtzen trebatzea eta haurrek giro lasai baten goza dezaten lortzea, besteak beste.

Ekimena hilaren 18an helduko da Aramaiora. 3 eta 6 urte arteko haurrendako eta horien gurasoendako antolatu dituzte, eta liburutegian elkartuko dira. Beste bi saio ere egingo dituzte, abenduaren 16an eta urtarrilaren 20an. Izena eman gura duenak liburutegira jo beharko du eta bertan bete beharko du izen-emate fitxa.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.