Udalak jakitera eman duenez bi aukera daude Adif erakundearen erantzunaren aurrean: "Alde batetik Madrilgo epaitegian helegitea jartzea norbanako bakoitzak, era indibidualean. Horrek koste ekonomiko handia omen dauka eta kasu askotan aurrera egiteko erreklamatzen den dirua baino gehiago ordaindu beharko litzateke prozesuan. Bestetik, Adifi kasua berraztertzeko eskaera luzatzea dago. Kasu honetarako abokatuak eredu bat prestatu digu eta horrek lur-jausia baino lehenago Udalak enkargatu zuen informe geologiko bat eta lur-jausiaren ostean udaletxeko arkitektoak egin zuen txostena atxikita eramango luke. Hori egiteko, erantzuna jaso eta hilabeteko epea dago". Eredua eta bi txostenak Udalaren webgunean edo udaletxean bertan egongo dira eskuragarri herritarrendako.
Publikoki salatzeko deia
Era berean, Udalak uste du "egoera lotsagarri" hori publikoki salatu behar dela eta Arabako Diputazioa ere interpelatu behar dela, "guztion artean" egoera salatzeko. Salaketa hori nola antolatu erabakitzeko herri batzarra –hirugarrena azken bi asteetan– deitu dute. Eguna ez dute zehaztu oraindik.