Horrela esan digu auzo-alkate Ekaitz Zubiak. Egubakoitzean hasi ziren jaiak eta hiru egunetan bertsotan, kantuan, dantzan, musean eta bolotan egin dute. Adin guztiendako ekintzak izan dituzte eta kanpotik ere joan zaie jendea bisitan, gehienbat Aretxabaletatik, Arrasatetik eta Aramaiotik.
Egubakoitzean bertso-afaria izan zuten Andoni Egaña eta Sebastian Lizasorekin: 50 lagun elkartu ziren. Zapatuan, berriz, umeendako pailazoak eta puzgarria izan zituzten, eta I. Mus txapelketa jokatu zen. Jose Luis Errastik eta Traillasek irabazi zuten. Bolo txapelketak ere jende ugari ekarri zuen; ehun bat lagun inguru.