Irailaren 6an hasi ziren ikasturte berriarekin San Martin eskolan. Haur Hezkuntza eta Lehen Hezkuntza kontuan hartuta, 144 ikasle eta 19 irakasle izango dira aurten. Iazko antzeko kopuruak dira eta ikasturte berriko nobedade nagusia da zuzendaritza taldea berritu egin dela. Datozen urteetan Santi Roman elorriarra izango da zuzendari berria. Kargu berria nola hartu duen kontatu digu Romanek: "Irakaskuntza publikoan tokatzen den kargu bat da. Lau urtean behin zozketa egiten da eta aurten guri tokatu zaigu. Aurrera egin behar dugu".
Elkarbizitzaren eta herriari lotzearen garrantzia
Eskola osatzen duen komunitatearen elkarbizitza aipatu du ikasturte berrirako erronka nagusi moduan. Baita herriarekiko lotura sendotzea ere: "Guretako oso garrantzitsua da elkarbizitza, eskolako agente eta partaide guztiak kontuan hartzea. Ez bakarrik ikasle eta irakasleak, baizik eta sukaldari, garbitzaile, gidari eta monitoreak ere. Horrekin lotuta, herriarekin ditugun loturak ere sendotu behar ditugu, herri batek ez duelako zentzurik eskola barik eta alderantziz".