Azken traka gaur Aramaion

Sanferminen inbidiarik gabe ospatu dituzte San Martin festak asteburuan Aramaion. Eguraldi paregabearekin eta alaitasunez beteta joan dira orain arte, eta pregoia eta dantza taldeko irakasleei egindako agurra bezalako uneek ukitu berezia eman diete festei. Gaur, astelehena, izango da jaietako azken eguna: koadrilen arteko pikea edota herri afaria izango dira hitzordu garrantzitsuenetakoak.

Giro jatorrean ospatu dituzte asteburuan Aramaion San Martin jaiak. Nicolas Gardokiren pregoiarekin ekin zieten egubakoitzean, eta gaur, astelehena, azkeneko kartutxoak erretzeko aitzakia ugari dituzte oraindik. 

Adin guztietakoak ikusi ditugu asteburuan jaietan murgilduta. Horietako bat izango da gaur gauean juergista onenari ematen dioten Urrezko gibelaren saria eskuratuko duena; berriketeroenak ere jasoko du sari berezia.  

Kontzertu jendetsuak 

Aramaioko jaietako ikurretako bat izaten da urtero musika eskaintza; oraingoan ere antolatzaileek asmatu dute, eta horren erakusle izan da, besteak beste, egubakoitzean txosnetan Betagarri, Zain eta Emon taldeek erakarri zuten jende multzoa. Zapatuan, bailarako taldeek, bai txosnetan zein Bizente Goikoetxea plazan, harrera ona izan zuten.

Gaueko emanaldiez gain, txarangak, txistulariek eta trikitilariek ere girotu dituzte aurtengo festak, alaitasun hori ekintza guztiei kutsatuz. Aipatzekoa ere, atzo, domeka, herriko plazan izandako herri kirol erakustaldi didaktikoa. 

 

Gazte eta txikien eguna 

Gaur, 11:00etatik aurrera, herriko gaztetxoen algara eta barrea ozen entzungo da. Jolasekin hasiko dute eguna eta eguerdiko Barre laborategia antzerkiaren ostean koadrilek hartuko dute lekukoa. Aurten ere, koadrilen arteko pikea, lehiaketa bat baino gehiago ondo pasatzeko aitzakia dela erakutsiko dute parte-hartzaileek.

Herri afariarekin eta ondorengo kale animazioarekin, datorren urtera arte agurtuko dituzte aramaioarrek sanmartinak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.