Egun hori pasa ostean banku zerbitzuek etorkizunean erabil zezaketen indizeak jakinarazi zituzten baina HMEIaren kasuan ez zen hala izan. Mailegu asko HMEIren arabera eginda daude eta horietarako bi aukera daude: maileguak berak alternatiba bat izatea kontratuan –hori da Kutxabanken kasua; horietan Euriborra gehi bat erabiltzeko alternatiba dago–. Beste erakunde batzuetan, berriz, maileguen kontratuan ez zen alternatibarik zehaztu eta horietarako Espainiako Gobernuak esan behar du indize berria zein izango den.
"300 edo 400 euro gehiago"
Kaleratzeak Stop plataformako kideek salatu dute balio berria ez dela argitaratu: "PPko Gobernuak ez du ordezkorik proposatu eta horregatik ezin da HMEI indizea desagerrarazi. Legea betetzeko eskatzen diogu Gobernuari, iazko apirilean egin behar zuen-eta". Errealitatea da, azaldu zutenez, Euriborra gehi 1 indizearen interesa %1,5era ez dela iristen eta aldiz HMEI indizeak %4,1eko interesa duela: "Etengabe igotzen doa eta horrek, edozein familiari ordaintzea ez dagokion 300 eta 400 euro gehiago ordaindu beharra suposatzen dio hilero. Hala, HMEI indizeak familia askori suposatzen dio hipoteka ordaindu ahal izatea edo ez, hau da, zulora erortzea edo ez", esan zuen Salva Gonzalez plataformako kideak.
Era berean, salatu zuten Espainiako Gobernuak erakundeak lehenetsi dituela familien gainetik: "Ez da ahaztu direlako izan, hausnarketa eta interesen azterketa baten ondorioz hartutako erabakia izan da. Hala, erakundeendako onuragarria den eta familiendako erabat kaltegarria den egoera mantentzea aukera dute".
Udalbatzak aho batez onartu zuen proposamena; deitzaileek biziki eskertu zuten Udalaren babesa.
Kutxabanki ere eskatu zioten HMEIaren berehalako ordezkapena eskatzea: "Horretarako ez du behin behineko erregimenaren ezartzea gauzatu arte itxaron behar, horren edukia garrantzirik gabekoa da-eta".