Azkoagan kanposantuko kapera zena eraberritzen dihardute. Lehenago teilatua konpondu zuten eta azken asteetan zutabeak eraberritu dituzte. Antonio Elejalde auzo alkateak esan digunez, ez dute lanerako gertu dagoen jende faltarik: "Egin beharreko lanaren eta dugun materialaren arabera egiten dugu deialdia".
Lanak ez dituzte amaitu oraindik: "Beste saio bat edo bi egin beharko ditugu, kaperako hormak margotu eta kanposantuaren maila berdintzeko lurra ekarri eta zabaltzeko. Horretarako, adibidez, lagun gehiago elkartuko gara".
Barajuenen, txukuntze-lanak
Barajuenen saio bakarra egin dute aurten; hilaren 15ean 18 lagun elkartu ziren: "Jendearen erantzuna oso ona izan zen. Garrantzitsuena auzolanaren atzean dagoen filosofia da. Horri eutsi egin behar diogu", esan digu Jon Arriaran alkateak. Bazterrak garbitu, eserlekuak margotu... hainbat lan egin zituzten.
Aurrerago elizatik elkartera arteko zatian porlana botako dute; Udalarekin adostu dute lan hori egitea, baina adituen laguntza beharko dute.
Lanean gogor aritu ostean hamaiketakoa egitea da ohitura. Jatekoa eta edatekoa Udalak ordaintzen du.