Hasieran jendeari animatzea kosta bazitzaion ere, pixkanaka musikaz alaitu zituzten Aramaioko kaleak bazkarirako gosea egin bitartean. Egun luzea izango zela agerian zegoen arren, musika taldeetako hainbat partaide bertan zeuden goizetik makina berotzeko gogoarekin.
Poteoa amaitu ondoren, Eguzkierripa auzora joateko momentua heldu zen bertan bazkaldu eta indarrak hartzeko, ondoren Aramaio eta Otxandioko muga jokatu zutelako.
Punk-rock eta erromeria
Ilargi beteak presentzia egin aurretik hasi ziren taldeak oholtza gainetik pasatzen. Guztira sei taldek jo zuten, Aramaioko GRT eta El Exterminio de la Raza del Mono eta Arrasateko Dirty Brothers punk-rock doinuak defendatzen; Izargi taldea erromeriaz Eguzkierripa alaitzen; Runba Gerrilla eta Bertso Tabern, folk musika irlandarra eta bertsoak uztartzen dituen ikuskizuna. Gau beroa izan zen, eta bertara gerturatutakoak, ez zuten aspertzeko inongo aukerarik izan.