Euskarazko liburuekin gozatu eta gero, oparitzeko aukera

Zuiako Kuadrilak eta Txirritola elkartearen laguntzarekin, Euskaltzaleen Topagunearen Irakurri, gozatu eta oparitu ekimenean parte hartu ahalko dute aurten, gaurtik aurrera, aramaioarrek, Euskal Herriko beste 24 herritan bezala.

Ekainaren 30era arte euskarazko liburuak irakurtzera animatu gura dituzte aramaioarrak eta, horretarako, hiru urratsetan garatuko da kanpaina:

• Irakurri: Herriko liburutegiko euskarazko liburu bat maileguan hartzea.
• Gozatu: Behin irakurrita, liburutegira itzultzerakoan fitxa bat bete behar da irakurritakoari buruzkoa. Trukean liburuzainak erosketa txekea emango dio irakurleari Arrasateko ala Gasteizko Elkar liburu-dendetan liburu hori bera ala euskarazko edozein. %25eko balioa duen erosketa txartela jaso dute irakurleek, orokorrean, eta %50 Txirritolako bazkide izanez gero.
• Oparitu: Liburua oparitu ala norberak beretzako har dezake.