Lehen fasean sartu da plana eta fase horretan aurrerapen dokumentu bat idatzita dago. Gero beste dokumentu bat osatuko da, etxez etxe egin beharreko aldaketak zehaztuko dituena. Baina orain aurrerapen dokumentu hori da landu beharrekoa: dokumentu horrek eraikitzeko, birgaitzeko edota handitzeko baldintzak erregulatzen ditu.
Bada, dokumentu urbanistiko hori herritarrekin partekatu eta euren proposamenak jasotzeko, lehen bilera bat egin zuten eguaztenean udaletxean.
Etxe huts asko
Udalak azterketa soziourbanistiko bat egin dezala eskatu dio arkitektura enpresa bati eta honakoak dira ondorio aipagarrienak: Ibarrako alde zaharrean okupazio maila txikia dela orokorrean –bereziki Nardeaga kalean–, irisgarritasun baldintzak nahiko onak direla, espazio libre baten beharra dagoela eta aparkatzeko arazoak daudela.Hala, adibidez, Nardeaga kalean plaza txiki bat egitea proposatzen du azterketa horrek.
Balio arkitektonikoa zehazten
Planak balio arkitektonikoa duten eraikinak zehazten ditu. Horien artean daude babes berezia behar duten eraikinak –eliza eta udaletxea, esaterako–, babes ertainekoak eta oinarrizko babesa behar dutenak. Bestalde, balio arkitektonikorik ez duten eraikinak ere badaude eta beraz, horietan edozein interbentzio egitea errazagoa izango da.
Andoni Sodupe Hirigintza zinegotziak nabarmendu nahi izan du dokumentazio guztia udaletxean dagoela: "Adibidez norberaren etxeak nolako babes maila duen jakin gura duena etor dadila udaletxera", dio.