Aramaioko emakume elkarteak Itur-Zuri du izena eta urtero moduan, Emakumeen Astea antolatu dute Udalaren eta Emakunderen laguntzaz. Gaur eta bihar izango dira azken ekintzak. Gaur bingo afaria egingo dute San Martin eskolako jangelan, 19:30ean hasita. Antolatzaileek 40 bat lagun espero dituzte, iazko antzeko kopurua. Bihar, berriz, Madrilgo El Coro Entredos emakumez osatutako abesbatzak emanaldia eskainiko du Kultur etxean (20:00). Era berean, aurten bigarren aldiz antolatu du Udalak Martxoaren 8ko kartel lehiaketa. Aurten ere Mikel Ruiz de Azuak irabazi du lehen saria –200 euro–. Bigarren saria, berriz, Maider Aldaik irabazi du –100 euro–.
Gaur da Emakumeen Nazioarteko Eguna. Bildu eta Aramaioko Alkartasuna alderdiek osatzen duten Udal Gobernuak adierazpen instituzionala atera du asteon, berdintasuna lortzeko borrokak "indar handiagoa" behar duela aldarrikatzeko. Hala, Udalak honako lehentasunak zehaztu ditu, besteak beste: berdintasunerako politika publikoak garatzea, programak zein proiektuak aztertu, garatu edota ebaluatzerakoan udalaren gobernu-ekintza orok genero ikuspegia kontuan hartzeko neurriak bultzatzea, eta emakumeen elkarteekiko zein mugimendu feministarekiko elkarrizketa politikoa indartzea.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.
Harpidetza aukera guztiak