Lehen metroak asfaltoan egin ondoren, segituan sartuko dira Barajuen auzoko mendi-pista eta bidexkatan. Elite, master 30 eta 23 urtez azpiko mailetakoek bost itzuli egin beharko dizkiote, bost kilometroko ibilbideari. Gainerako lau mailetakoek hiru itzuli egingo dituzte.
Debagoieneko ordezkariak
Antolatzaileek 130 bat parte-hartzaile espero dituzte. Asko, maila handia dutenak. Elite mailarako hiru izen azpimarratu behar ditugu: Patxi Cia gipuzkoarra, Diego Latasa nafarra, eta Ismael Esteban kantrabiarra. "Ezustekorik ez badago, euren artean egongo da irabazlea", esan digu Martin Arriolabengoa antolatzaileak.
Dena den, kontuan hartu beharreko izen gehiago ere badaude: debagoiendarrak direlako, eta horietako batzuk, etorkizuneko ziklistak. "Alex Aranburu eta Julen Axpek gogor entrenatzen dihardute. Ea bada, zer egiteko gai diren", dio Arriolabengoak.
Iñigo Roldan, Zigor Urain, Aritz Kortabarria eta Asier Beitia dira gure beste ordezkariak.
Iñaki Lejarreta, gogoan
Antolatzaileek ez dute ahaztu abenduaren 16an hildako Iñaki Lejarreta. Urte askoan parte hartu izan du Aramaioko mendi bizikleta txapelketan. Ama aramaioarra zuen Lejarretak. "Iaz ez zen egon gurekin, baina orain bi urte bai. Bere heriotza kolpe gogorra izan zen guretako. Ez dugu omenaldi berezirik egingo, baina haren oroimenezko proba izango da", esan digu Arriolabengoak. Horren lekuko, proba iragartzeko kartela: Iñaki Lejarretaren irudia erabili dute.
Beste probak
Gainerako sei probak Erandion (apirilak 14), Bilbon (maiatzak 5), Legution (ekainak 9), Zallan (ekainak 30), Oiartzunen (uztailak 13) eta Zegaman (irailak 9) egingo dituzte.