Ura buruhauste iturri ari da izaten Aramaion. Azken egunotan egindako elurrak eta euriak lurjausiak eragin ditu hainbat tokitan. Alkateak berak eta Aitziber Zumalde aguazilak goiz osoa egin dute auzoz auzo kalteak ikusi eta Arabako Diputaziora bidali gura duten txostenerako argazkiak ateratzen. Lurjausirik ikusgarriena AHT-ko lanetan gertatu dena izan da: Cuatrovientos baserriaren ondoan, duela bi urte errepidea itxi zen tokitik oso gertu, lurrak A-2620 errepideko alde bat hartu du. Obrako langileak goizetik ari dira ingurua txukundu eta autoen zirkulazioa errepideko alde batetik bideratzen.
Hainbat errepide itxi behar izan dituzte eta badira oraindik etxetik autoan irten ezin daitezkeen bizilagunak. Hori da Induspe Goiko baserrikoen kasua: "Lurra ezin dugu oraindik errepidetik jaso, euria ari du-eta etengabe. Udaleko arkitektoa egon da eta esan digu badaezpada ez ukitzeko. Amak 87 urte ditu eta orain bertan ezin da etxetik irten medikuarengana joateko, adibidez", diote.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.