Santa Ageda bezpera astelehenean izango den arren, aramaioarrak aurreratu egin dira eta gaur egun guztian Santa Ageda koplak entzun ahal izan dira Aramaioko auzoetan barrena. Aspaldiko Santa Ageda batzerik jendetsuena izatea nahi zuten antolatzaileek eta baita lortu ere. 50 pertsona inguru batu dira eta eguraldiak batere lagundu ez dien arren ondo baino hobeto ibili dira baserriz baserri kantuan. Herriko bertsolariek protagonismo berezia izan dute gainera, Santa Agedako koplekin batera bertsolariek bat-batean abestu dutelako.
Iturrieta sagardotegian topatu ditugu guk eguerdian goiz guztian kantuan ibili ostean tripa betetzen; hori ere egin beharrekoa da-eta. Bazkalostean Arragako baserrietan hasiko dira eta handik beherantz egingo dute: Basagoitia, Errota Berri eta Zalgo, besteak beste. Gero Ibarrara jaitsiko dira azken saioa egiteko, 18:00ak aldera.
Hotzak eta txingorrak ez ditu aramaioarrak kikildu eta argi utzi dute eztarriz sano dabiltzala eta kantatu nahi dutela gogoz!
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.