Txalaparta doinuekin hasi da denboraldi berria estreinatzeko ekitaldia. Gero, Aramaioko Manex Agirre eta Xabi Igoa bertsolariek bertso bana kantatu dute eta ondoren Juan Jose Peciña Iturrietako sagardogileak hartu du hitza: "Inoiz ez dut berbaldia prestatzen eta aurtengoa ez da ezberdina izango. Arabako sagardogileen ordezkaritza hemen dugu eta baita Goseko musikariak ere. Eskerrik asko etortzeagatik eta ondo pasa!".
"Publiko orokorrarendako sagardoa"
Sagardoaren gainean honakoa adierazi du Iturrietako sagardogileak:"Edateko oso erraza da; publiko orokorrarendako sagardoa da. Suabeagoa, erraza. Gure helburua da sagardo munduan jende asko sartzea eta gerturatzea, publiko guztiarendako sagardoa egitea". Peciñak 16 urte daramatza Iturrietan, eta krisi garaia den arren, euskaldunok sagardo denboraldiari erantzun ona emango diogula uste du.
Peciñaren berbaldi motzaren ostean Ines Osinaga Goseko abeslariak ireki du kupela. Arabako sagardoa aldarrikatu du Osinagak. Gero herritar guztiek hiru kupeletako sagardoa dastatzeko aukera izan dute, giro ederrean. Jatekorik, noski, ez da falta izan.
