Aramaioko Oleta auzoko bizilagunek 13:30ean egingo diote omenaldi ekitalditxoa borrokalariari. Lore-sorta emango diote, bertsoa botako dio auzoko batek, aurreskua dantzatuko diote eta Galdakaoko Andra Mari dantza taldeak haren omenez dantzatuko du. Auzoko plazan izango da dena. Londresko Olinpiar Jokoetan irabazi duen brontzezko domina eskertuko diote horrela auzokideek.
Oletako auzo alkateak, Agurtzane Ortiz de Landaluzek, esan digu Maider Unda jakinean dagoela: "Haren amari komentatu genion eta Maiderrek badaki ekitalditxoa egingo diogula".
Aurrera begira, Aramaioko Udalak ere omenaldia egingo dio Undari. Noiz egingo dion zehaztu gabe dute oraindik.