24 ordu Maider Unda urreagatik borrokan hasteko

Bihar, abuztuak 9, hasiko du Maider Undak azken lau urteotako borroka garrantzitsuena, eta zorte apur batekin, baita kirol bizitza osokoa ere. Abuztuaren 5etik dago Olaetakoa Londresen, eta han, besteak beste, apur bat entrenatzeko aprobetxatu ditu egunak. Bihar, arratsaldeko lehenengo orduan hasiko dituzte kanporaketak, Excel izeneko kirol instalazioetan (Olinpiar Jokoetako handienak) eta arratsaldeko azken orduan lehian jarraitzen badu seinale ona izango da, azkenera arte egin duen seinale. Uztailean aurreratu moduan urrearekin egiten du amets: "Zergatik ez? Horretarako egin dut horren gogor lan", baina Pekinen lortutako diplomaren ostean, domina batekin elite mailari agur esatea demasekoa izango litzateke oletarrarendako.