Egubakoitzean, 20:00etan, hasiko dira jaiak etxafuego eta kanpaien errepikapenaz. Eta jaietako lehen egunean ohitura denez, 21:00etan auzoko bertso afaria egingo dute Uxue Alberdi eta Iker Zubeldiarekin.
Bizikleta lasterketa zapatuan
Zapatuan, berriz, egun osorako egitaraua prestatu dute: 12:00etan meza, 13:00etan Ibarra auzotik Arexolara bizikleta lasterketa, 17:30ean mus eta briska txapelketa plazan eta Arexolatik Arriolara arteko kalejira, 19:30ean kanpai jotzearen erakustaldia eta 23:00etan dantzaldia Laja bigarrena eta Narbaiza trikitilarien eskutik.
Parrandarekin behar den moduan amaitzeko, goizaldean txokolatea eta bizkotxoak banatuko dituzte. Zapatuko ekitaldien artean, bizikleta lasterketa nabarmendu beharra dago, urtero adin guztietako hainbat parte hartzaile batzen ditu-eta. Gaztetxoek primeran pasatzen dute; antolatzaileek espero dute aurten ere hala izatea.
Domekan, meza, dantzariak eta umeendako jolasak
Zapatuko ajeari aurre egiteko hiru ekitaldi izango dira domekan: 12:00etan meza nagusia, mezaren ostean Aramaioko dantza taldearen emanaldia eta 18:00etan umeendako jolasak. Jolasen ostean datorren urtera arte agurtuko dira jaiak.