Urteroko ohiturari jarraituz atzo, San Martin egunaren osteko lehen domekan, ospatu zuten San Kristobal eguna aramaioarrek. Urtez urte gero eta jende gutxiago biltzen da San Kristobal ermitan eta aurten eguraldiak ez duenez larregi lagundu "inoiz baino jende gutxiago" elkartu da, Angel Mari Lopez de Bergara Uribarriko auzo alkatearen arabera. 150 bat lagun elkartu zirela adierazi du. Aspaldiko usadioak dioenez, Aramaioko abadeak bedeinkatutako olioa belarrian igurzteko aprobetxatu zuten askok, urte osorako belarriko gaitzak ekiditeko.
Egitarauan ez zen aldaketarik izan: San Kristobal ermitan meza 12:00etan, Bizente Goikoetxea abesbatzaren saioa, mokadutxoa, auzotarren arteko bazkaria eta egunarekin amaitzeko, bolo txapelketa 18:00etan. Trikitilaririk ere ez zen falta izan.
Bedeinkatutako olioa belarrian igurtzi
Aramaioarrek modu berezian ospatzen dute San Kristobal eguna. Autoak bedeinkatu beharrean olioa da bedeinkatzen dutena, gero belarrian igurtzi eta urte osorako belarriko gaitzak ekiditeko. Datorren urtera arte!
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.