Iaz hasi ziren indusketa lanak Murugainen, Ondare Babesa enpresaren eta Aramaioko Udalaren arteko akordioari esker. Lehen fase horretan arkeologia lanak jaso zituzten; Burdin Aroko harresiaren eta 36ko gerraren aztarnak, hain justu. 130 metro koadro ireki ziren Murugaingo puntu ezberdinetan, arkeologikoki oso emaitza interesgarriak lortuz eta Murugaingo Historia berriro ere azaleratuz.
Auzolanean oinarrituz
Etor Telleria Ondare Babesako langileak iazko lanak esperientzia positiboa izan zirela dio. 36Ko gerrako materiala lortu zen eta Burdin Aroko harresiarekin ere egin zuten topo. Orain, bigarren faseko helburu arkeologikoak berberak dira baina horiek lortzeko bideak, berriz, ezberdinak.
AOBT, pozik lehen bileraren erantzunarekin
Auzolana izango da oinarri, beraz. Lan egiteko modu hori ez da berria Aramaion eta Telleria itxaropentsu dago aramaioarrak inplikatuko direlako. Atzo egin zuten bilera irekia udaletxean auzolan horiek antolatzeko. Aramaioko Ondarea Berreskuratzeko Taldeko Alex Mendikute pozik zegoen bileraren amaieran, herritarrek ondo erantzun egin zutelako. Hori bai, hasieratik kezkatuta zegoen: "Kezka beti dago hor. Orain, gainera, udako egunak dira eta jaiak dira nonahi, eta auzolana lana egiteko da, ez bakarrik hamarratekoa jateko. Hala ere, jendeak erantzun du eta oso pozik gaude".
Aurkikuntzak, irailean
Uztailean egingo dira indusketa lan berriak eta asmoa da irailean emaitza guztiak aurkeztu eta bisita gidatuak egitea, Murugainen bertan.