1868an jarri zen martxan erlojua. Izan ere, udaletxea ordulari barik egin zuten, herriko erlojua Sastiñako dorrean zegoelako. 1822an, Ibarrako eliza egin zenean, diruz gaizki zebiltzalako dorrea bota zuten hango materiala eliza berrian aprobetxatzeko. Orduan egin zen udaletxe gaineko dorretxoa, erlojuarendako.
4.300 erreal kobratu zuen diseinatzaileak
Erlojua Don Francisco Paula de Abaituak diseinatu zuen eta lan horregatik 4.300 erreal kobratu zuen. Diru asko izan zen garai hartarako; udaletxeak ordaindu zuen osorik eta orduko kontratuan jasotzen denez, lau urte behar izan zuten ordainketa egiteko.
Kontratu horretan jasotzen dira, era berean, erlojuaren ezaugarriak eta egileari egiten zaizkion eskaerak: "Erloju berriak bere makinarian jaso beharko ditu ordu erdiak eta ordu osoen errepikapenak [...]. Zazpi edo zortzi egunetarako soka izan beharko du, pisuak jasotzea ahalbidetuko duten gurpil errazekin".