Orixol mendizale elkarteak irteera berezi bat antolatzen du urtero Sanjuanak baino astebete lehenago. Iaz, esaterako, Monte Perdido igo zuten. Aurten ere ez dute hutsik egingo; Frantziako Piriniotako Vignemale mendi mitikoa igoko dute datorren aste bukaeran, hilaren 17an. 20 bat lagunendako lekua dago aterpetxean eta antolatzaileek jakinarazi dutenez, dagoeneko 15 lagun daude apuntatuta. Beraz, izena eman gura duenak ahalik eta azkarren egin beharko du Añai tabernara, bertan dagoen zerrendan izena emateko. Ordaindu beharreko kopurua eta argibide gehiago, Añai tabernan. Izen-emate epea domekan amaituko da.
Zapatuan, hilak 16, 06:30ean egin dute hitzordua auobus geltokian. Lehen egunean ibilaldi laburra egingo dute eta domekan, berriz, saiatuko dira Vignemale mendiko tontorra egiten (3.298 metro). Frantziako Piriniotako gailurrik altuena da.
Materiala etxetik eramateko aukera
Antolatzaileek gomendatu dute etxean kranpoiak eta pioletak dituztenek badaezpada eraman dezatela: "Materiala eramango dugu baina norberaren materialarekin ibiltzea nahiago duenak eraman dezala", adierazi dute.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.