Euskal foru-zuzenbideak Aramaion duen eragina aztertzeko eta herritarrei eskubide berezi horren berri emateko, egubakoitzean ekitaldia egin zuten kultura etxean. Herritarrek gainera, interesa erakutsi zuten gai horren gainean, izan ere, aretoa bete-beteta egon zen.
Ekitaldiari hasiera emateko, Bizente Goikoetxea abesbatzak bi abesti kantatu zituen. Gero, Ramon Ajuria alkateak ongietorria eman zien bertaratutakoei eta horren ostean etorri ziren Patxi Uribarren Aramaion jaiotako euskaltzainaren hitzak eta baita Andres Urrutia euskaltzainburuaren azalpenak ere.
Euskal foru-zuzenbidea
Euskal foru-zuzenbidearekin, besteak beste, senar eta emaztearen artean testamentuaren bidez ahalik eta gehien eman diezaiokete elkarri Aramaion, hori da tronkalitatea: "Horrek guztiak, Aramaiori nortasun berezia ematen dio".
Urrutiak gaineratu zuen Aramaio herri bakarra dela Araba osoan euskalduna dena eta gainera foruduna. Azaldu zuen baita ere kontzeptu horiek Aramaioarren historian guztiz "errotuta" daudela.
Aramaion aplikatzen den Euskal foru-zuzenbidearen etorkizunaz galdetuta, Urrutiak esan zuen gaur egungo beharretara egokitzen baldin bada, posible dela etorkizunean horrek irautea eta talde bat badabilela egokitze lanetan.