Aurrekontuetan bi arrazoik eragin zuzena izango dute, Altunak aurreratu duenez. Lehena da Arabako Aldundiak urtero bideratzen duen diru kopurua %15a murriztuko duela. Diru hori da Udalaren diru iturri nagusia eta beraz, asko baldintzatuko du kudeaketa. Bigarren arrazoi bat ere badago: Etxaguen auzoko hiri-azpiegiturak eraberritzeko lanak –errepidea zabaldu behar da, besteak beste– urtarrilean hasiko dira, lanok egingo dituen enpresa esleitzeko prozesua ondo badoa.
Bada, lan horien %80a Diputazioak ordaindu behar badu ere, Udalarendako diru asko suposatuko du. Hala, nahitaez murrizketak egin beharko dituzte: "Murrizketak orokarrak izango dira baina Ongizatea, Euskara eta Kultura bermatzeko, Hirigintza Sailak jasoko du murrizketa handiena".
Bilduren hiru mozio
Bestalde, plenoan hiru mozio aurkeztuko ditu Bilduk. Lehenak emakumeen kontrako indarkeria izango du hizpide; genero indarkeriaren aurrean "udal politika aktibo, osoa eta koordinatua" egiteko konpromisoa jasotzen du.
Bigarrenak, Euskararen Egunaren harira, udal jarduna euskaraz egiteko konpromisoa jasotzen du eta azken mozioak, berriz, euskal presoen eskubideak aldarrikatzea du helburu.