Joan den zapatuan, azoka eta gainerako ekitaldi guztiek Aramaioko erretiratu guztiak omentzea zuten helburu. Hala, Udaleko ordezkariek Aramaioko pertsona edadetuenak omendu zituzten: duela 95 urte Cuatrobientos baserrian jaiotako Bittori Garai eta orain 93 urte Ibabe baserrian jaiotako Balentin Ibabe. Garai Arrasateko Iturbide egoitzan omendu zuten, lore sorta batekin. Ibabe, berriz, haren etxean: bertan izan ziren, besteak beste, Ramon Ajuria alkatea eta Edurne Uribarren-Iturrieta Ongizate zinegotzia; txapela oparitu zioten.
Bestalde, kiroldegian egindako bazkarian 125 lagun elkartu ziren, Aramaioko zein inguruetako erretiratuak. Bapo bazkaldu ostean Benidormerako bidaiaren zozketa heldu zen. Bada, Oletako Mantsoa baserriko Amparo Armendariz izan zen irabazlea. Astebete osorako bidaia irabazi zuen Armendarizek, 65 urte baino gehiago duten bi pertsonendako. Hiru izarreko hotel batera joango dira, zortzi egun eta zazpi gau.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.