Udalbatzak aho batez onartu zuen ABBko eraikineko bigarren faseko lanak Artzamendi enpresari esleitzeko proposamena, EAJko zinegotzi Iñaki Nafarreteren abstentzioa izan ezik.
Egun Mendiolan kokatuta dagoen eraikinaren egitura dago eginda bakarrik eta hastear dagoen bigarren fasean fatxada egin eta gune ezberdinak zehaztuko dira. Hainbat elkarte eta proiektu bilduko dira eraikin beraren bueltan, besteak beste, Aramaiako sagarzaleen elkartea eta kontsumo taldeak.
Gorrien Bideko konponketa lanak, amaituta
Bestalde, aurreko legealditik datorren proiektu bati amaiera eman zitzaion plenoan. Hau da, Aramaio eta Otxandio lotzen dituen Gorrien Bidea konponduta dago. Lanok aurrera eramateko ezinbestekoa izan da Diputazioaren laguntza.
Amaitzeko, atzoko plenoan egin zen azaroaren 20ko hauteskundeetarako mahaian egon behar direnen zozketa, programa informatiko baten bidez. 18 herritarrek jasoko dute jakinarazpena datozen egunotan.