Oso pozik daude Ondare Babesekoak uda partean Murugainen egindako indusketen emaitzekin. Lan horietan parte hartu zuen Etor Telleria arkeologoak aipatu du Burdin Aroko eta Espainiako gerrako ikerketa lerroen gaineko aurreikuspenak bete egin direla.
Burdin Aroko harresia
Ondorio nagusietako bat izan da Murugainen herri harresia bazegoela berrestu dutela. Horren harira, arkeologoak azaldu du indusketei esker Burdin Aroko harresia bistaratu egin dela, eta hainbat zatitan, gainera, ondo kontserbatuta dagoela egiaztatu dutela. Horrez gain, Burdin Aroko aroarekin jarraituz, barruko bizileku baten aztarnak topatzen saiatu dira. Ondare Babeseko arkeologoaren esanetan, aurkikuntza horiek ez dira hain garbiak izan. Zeramika puskak eta eskuzko errota zatia agertu dira, eta horrek erakutsi du bizileku bat zegoela han, baina ezin izan dute lotu bizileku zehatz batekin.
Gerra Zibileko trintxerak
Beste ondorio nagusietako bat izan da Espainiako Gerra Zibilean trintxeretan nola mugitu ziren ikusi ahal izan dutela. Lubakia Burdin Aroko harresiaren atzetik egina zegoen; aprobetxatu zuten aurretik eginda zegoen egitura defentsiboa. Dragones batailoiko gudariak eta sozialista gazteak izan omen ziren han Elorregiren esanetan. Horrez gain, munizioa eta hustuta dauden 60 janari poto agertu ere agertu zirela kontatu digu. Telleriaren esanetan, horrek agerian utzi du gotorleku edo sukalde modukoa zegoela han.
Bihar, zapatua, auzolana
Bihar, ostera, Murugaineko indusketa-gunea bertatik bertara ezagutzeko irteera egingo dute. Herritarrak goizeko 09:00etan, pilotalekuan daude geratuta, eta ordi erdi beranduago, auzolanarekin hasiko dira Murugainen.