Proiektua aurrera eraman ahal izateko, Udalak sei familiaren lur sailen eremu zati bat desjabetu du; horietako bost familiarekin akordio batera iritsi dira eta desjabetzeak sinatu dituzte, baina Uribarren familiarekin ez dira akordiora iritsi.
Uribarrenekoak haserre
Uribarrenekoek diote auzoan badagoela errepide nagusi bat eta egokitu nahi duten bide hori bigarren mailakoa dela. Gainera, kortak dituzte egokitu nahi duten errepidearen bi aldeetan eta diote obra horiek orain arteko ganadu eta baserri aktibitatea galarazi egingo dietela. Eurek eskatzen dute lau metroko bidea egin beharrean, hiru metro eta erdikoa egitea, horrela, gutxienez, euren traktorearendako lekua izateko, besteak beste.
Derrigorrezko desjabetzea
Bestalde, Aramaioko Hirigintzako batzorde buruak azaldu digu Udalak bere garaian hartu zuela erabakia horrelako proiektuak egiten direnean bideek lau metroko zabalera izateko, autoak gurutzatzeko lekua izateko. Eta gaineratzen du Uribarren familiakoekin akordio batetara iritsi ez izanaren arrazoi nagusia negoziazio prozesu luzean dagoela; gutxi gorabehera bi urte daramatzate kontu horrekin eta ia 800.000 euroko diru laguntza dute, baina laguntza hori jasotzeko epeak bete behar dituzte. Esan digute, baita ere, argi utzi nahi dutela desjabetze horiek ez dutela eraginik Uribarrengoen azpiegituretan.
Uribarren familiakoek aitortu digute oraindik ez dutela itxaropenik galduko; Udaleko ordezkariek, bestalde, gaineratu digute aurten esleituko dituztela obrak.